Monday, December 17, 2007

! البحث عن السـيد/ مصري



..ولا يزال البحث جاري عن السـيد / مصري .. الشبـه مختفي أو مـــنقرض بصفاتـه

.. بأصالتــه وروحه الحلوة


.. بطيبة وطهـارة قلبــه


.. بحبه لغيره


.. وســـؤاله على عــم حنا جاره


.. واختلاطه باليوناني والارماني والايطالي وهنا القايمة تطول بزيادة


.. بحبه لفـن الريادة


.. وعشـــقه لبلده كمان بزيادة


في ضعـفه وقوته .. وخوفه ووحدتــه .. في فرحه وكمـان في حزنه وكربته هو مصـــري .. عمره ما لعـن أو اتبرا من مصريته، عشـان كان عــارف إنهــا هي الســـر في قـوته

8 comments:

mohand said...

السلام عليكم

ايه ده

هو انتوا بتدوروا عليا وانا مش عارف

انا موجود اهوه
بس اطحنت من الغلاء
وشماتة الاعداء
وندالة الاصدقاء
من وزيري اللي بياكل خيري
ومحافظي اللي شارب دمي
من اولادي اللي مش قادر افتح عيني قدامهم
لان كرامتي مفقوده في عيونهم
من جيبي المخروم
وانا مش لاقي هدوم
من حقي المهضوم
وعيوني مش شايفه النوم
خايف اموات
اسيب ورايا ايتام بالكوم
قولت استخبالي يومين
يمكن يطلع النهار واعود بايدين
لا ايدي قويت ولا اليومين عدوا
وكل الحاجات الوحشة مش قادرين يتعدوا
قوليلي بتدوروا عليا ليه ؟
هو انتوا حسين باللي انا فيه؟
تحياتي

walaa said...

وعليكم السلام

ايه ده ..؟موجود .. سؤالنا كان ليه .. وإيه ايل حصل ..

خلى المصري الطيب لا حس ولا خبر .. خلى الوش عبوس .. والتكشيره وضرب البوز ..

خلى المصري مابقاش مصري .. لا أصالة ولا طيابة ولا حتى شوية كرامة ..

هتقولي حمل كبير شايلة خلى الضهر محني .. يعني زمان ماكانش كمان في حمل كبير شايله..

هتقولي ماكانش ينفع اعيش ضعيف غلبان وسط الحرامية .. اقول وبقيت ايه..؟ لا بقيت م الحرامية ولا فضل لك مكانك وسط المصراوية ..

اصحى وقاوم وبلاش تسيب اندال وشوية حرامية يسلبوك اجمل صفاتك وتقول مش بايدايا ..

اصحى وحاول وهات ايدك يا مصري وادي ايدايا نتعاهد نرجع لعصر الطيابة عصر لا فيه انذال ولا حرامية .. لا فيه شقى ولا ذل ولا البهدلة ديه ..

عهد بنحافظ فيه على جوانا بجد يفضل نضيف طيب خالي من الزيف .. يفضل مصري فيه موجود .. ولا مكان للاشقياء والحرامية.

تحياتي

اسامة يس said...

ستظل تبحث يا صديقي كثيراً
ستظل تبحث في الوجوه
في الطرقات
في اروقة المعابد
ستظل تبحث وتداري الانين
وتقول
عله في غياهب الجب
عله يعود
عل السنين الطامسات على الحقيقة يجلوها المطر
لكنما اظن ان الوقت فات


كلماتك بحسها الشجي دفعت القلم للتفاعل فعذرا على هذا العبث...
دمت بكل ود..
خالص تحياتي

abderrahman said...

كلام جميل وخفيف ومعبر يا ولاء
السيد المصري أكيد موجود.. لكن مختفي وحزين على اللي بيحصل

Barrak said...

السيد المصري موجود بطيبته بنقاوته

mohand said...

السلام عليكم

ايه فينك يا قرينة مولدي
مش باينه ليه كده؟

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my site, it is about the CresceNet, I hope you enjoy. The address is http://www.provedorcrescenet.com . A hug.

walaa said...

osama

اهلا وسهلا بك أخي الكريم ..

اشكرك على اضافة تلك المعاني والتعابير الغنية .. التي ارى انها ليست بالعبث على الاطلاق ..

ولكن اتراه حقا الوقت قد فات ..؟
صدقاً أتمنى أن لا ...

كل الشكر على الزيارة .. وخالص التحية

...

Abdou Basha

اسمحلي احيي نظرة التفاؤل ايل بتتكلم بيها عن وجود السيد مصري .. يمكن يكون لسه في امل .. يمكن ...

كل الود

...

Barrak

جميل انك شايفه لسه موجود ..

وكل الشكر على المرور الكريم


...

Mohand

اهلا مهند .. كالعادة شوية مشغوليات .. تسلم على السؤال وربنا يبارك فيك

خالص التحية

...

CresceNet

U r welcome :)