صباح الخير

من الغريب اننا بنردد التحية دي كل يوم ،، دة احنا يمكن حتى بنرددها اكتر من
مرة واحدة في اليوم نفسه،، بس يا ترى احنا حاولنا ولو مرة واحدة نفكر في الكلمة نفسها ،، يعني التحية .. عن نفسي فكــرت .. فكرت اننا ببداية يومنا بنستعين بالرحمن ونبدء يوم جديد ما نعرفش اي حاجه عن أحداثه أو إيه ممكن يكون شايلنا نهاره .. ؟؟ .. وأجمل حاجه هنا إننا نتمنى لبعض إن اليوم " المجهول" ده يكون يوم طيب،، كله خير وبركة ومحبـة ..

"تبسمك في وجه أخيك صدقة " .. ده حديث شريف عن الرسول صلى الله عليه وسلم .. يا ترى كام واحد مننا بيعمل بيه ؟؟ .. اعتقد انه مش كتير،، لاننا بنشوف كتير مننا بيكون أد إيه عبوس،، وكاره للدنيا والناس وهو حتى بيسلم على أي حد مر عليه .. افتكر إن في موظف كبير شويه في السن بمر عليه أحيانا نفسي مرة أشوفه بيرد السلام وبيبتسم حتى،، نفسي كمان على فكرة اني الفت نظرة لطريقته دي ،، خصوصا انه بيقابل أشخاص كتير طبيعة عمله بتفرض عليه انه يقابلهم على مدار اليوم .. فمش شيء طيب أبدا إن دي تكون طريقته في معاملاته ..

ختاما بقى،، اعتقد لحد بعيد إن طريقة بدئنا ليومنا بتأثر على يومنا بشكل كبير جدا،، يعني لو بدئنا يومنا عبوسين مهمومين في الغالب يومنا مش هيكون موفق أوي خصوصا من الناحية النفسية .. إما إذا بدئناه بأمنية طيبة لينا ولغيرنا من حولينا .. بدئناه ببسمة صافية صادقة .. فمن المؤكد انه كتير هيختلف،، إن شاء الله .. وهيكون مردوده اجمل على الاخرين وعلينا احنا نفسنا ..